17-anyos inutas ng sariling utol

CEBU CITY, Philippines - Napas­lang ang 17-anyos na bi­natilyo matapos itong saksakin ng sariling utol noong Sabado ng gabi sa Barangay Duljo-Fatima, Cebu City, Cebu.

Naisugod sa Cebu City Medical Center subalit namatay din ang biktimang si Edgar Calero Jr.

Sumuko naman sa Mambaling PNP ang suspek na si Carlo Calero, 18, kapwa nakatira sa nabanggit na barangay.

Sa inisyal na pagsisiyasat ng pulisya, lumilitaw na hindi magkasundo sa maraming bagay ang mag-utol simula pa noong mga bata sila.

Sa pahayag ng nanay na si Jocelyn Calero, wala sa kanilng bahay ang magkapatid nang maganap ang krimen.

Napag-alamang nagkasagian ng siko ang mag-utol habang naglalakad kaya nagalit si Carlo at sinuntok ang nakababatang utol.

Gayon pa man, gumanti si Edgar kaya lalong tumindi ang galit ni Carlo sa kapatid kung saan inundayan naman ito ng saksak sa kaliwang dibdib.

Nakatakbo pa ang bik­timang naghihingalo at naipaabot sa kanyang nanay ang ginawa sa kanya ng kapatid subalit namatay din habang ginagamot sa nabanggit na ospital.

Nahaharap naman sa kasong murder ang suspek sakaling kasuhan ito ng sariling ina.