2 notoryus utas sa parak!

MANILA, Philippines – Dalawang umano’y miyembro ng notoryus na sindikato ang napaslang habang isa namang opisyal ng pulisya ang nasugatan matapos na magbarilan sa Brgy. San Antonio, Boljoon, Cebu  kamakalawa.

Kinilala ang mga nasawi na sina Arnel Coronel at isang alyas Titing; pawang miyembro ng Ganyolon-Salonoy Coronel Syndicate, na isinasangkot sa talamak na robbery/holdap, illegal drugs, gun-for-hire, rape at extortion. Isinugod naman sa ospital si Inspector Dexter Basirgo na siyang namuno sa  operasyon laban sa mga ito.

Sa ulat ni Cebu  Police Director P/Sr. Supt. Noel Gillamac, naganap ang shootout sa pagitan ng pulisya at mga suspek sa nasabing lugar bandang alas-12:22 ng hapon matapos na maispatan si Coronel at mga kasama nito.

Agad na nagkaroon umano ng palitan ng putok sa pagitan ng mga pulis at  mga suspek.

Nagawang makatakas ang ibang miyembro ng sindikato na tinutugis na ng pulisya.