2 nag-bomb joke sa pantalan, inaresto
MANILA, Philippines - Bagsak kalaboso ang 40-anyos na misis matapos itong arestuhin ng port police dahil sa pagbibiro na may bombang sasabog mula sa kanyang bag na lumikha naman ng matinding komosyon ng mga pasahero sa Pier 4 sa North Reclamation Area sa Cebu City, Cebu noong Martes ng gabi.
Pormal na kinasuhan ang suspek na si Charito Abao, tubong-Camiguin kung saan ipiniit sa Waterfront PNP Station.
Sa ulat na nakarating kay P/Inspector Evan Epe, hepe ng Intelligence and Investigation Section ng Cebu Port PNP, si Abao ay nahaharap sa kasong paglabag sa Presidential Decree 1727 (Anti-Bomb Joke Law).
Nabatid na si Abao ay isa sa mga pasahero ng barko na patungo sa bayan ng Hubangon, Camiguin kung saan bigla na lamang sumigaw na may bomba sa kanyang bag na sasabog anumang oras.
Lumikha naman ng matinding pagkabulabog ang mga pasahero at agad namang humingi ng tulong sa mga awtoridad ang iba pang pasahero at itinuro ang suspek.
Dito na dinakma ng port police ang suspek kung saan naging negatibo at wala namang nakuhang bomba matapos dalhin sa presinto.
Samantala, inaresto rin ng pulisya ang 24-anyos na pasaherong si Jimboy Feloche na patungong Leyte matapos itong mag-bomb joke sa Pier 3 noong Huwebes (Hulyo 31).
Iginiit naman ni Feloche na nasa impluwensya siya ng alak kaya nagbiro kung saan nakalaya ito matapos maglagak ng P16,000 piyansa.
- Latest
