Lider ng task force, itinumba

TUGUEGARAO CITY, Cagayan, Philippines - Pinabulagta ang 62-anyos na team leader ng Anti Illegal Logging Task Force makaraang pagbabarilin ng mga di-kilalang lalaki ang nagbabantay sa checkpoint sa pampang ng Abuan River sa Barangay Villa Imelda, Ilagan City, Isabela kamakalawa.?

Kinilala ni P/Supt. Vicente Valdez, hepe ng Ilagan PNP ang biktima na si Alfredo Ilayat na dating chairman sa Barangay Cabisera 17-21 sa nasabing lungsod.?

Nabatid sa ulat ng pulisya, naiwang mag-isa ang biktima sa checkpoint habang ang kanyang mga tauhan ay nagsagawa ng operasyon laban sa illegal logging.

Nang bumalik ang mga tauhan ng nasabing task force sa checkpoint ay bumulaga sa kanila ang duguang katawan ng biktima.

Narekober sa crime scene ang ilang basyo ng bala ng cal. 9mm pistol at ang shotgun na gamit ng biktima sa pagbabantay.