Totoy pisak sa gumuhong bato

TUGUEGARAO CITY, Cagayan, Philippines - - Pisak ang ulo ng 10-anyos na totoy matapos itong mabagsakan ng malaking tipak na bato na bumigay matapos niyang tuntungan kasama ang dalawa pang kalaro sa Barangay Barbar, San Juan, Ilocos Sur kamakalawa. Kinilala ni SPO1 Romulo Aguilar ang biktimang namatay na si Joseph Aquino III, Grade 3 sa Barbar Elementary School at nakatira sa nasabing barangay. Lumalabas sa imbestigasyon na nagtungo ang biktima kasama ang dalawang kaibigan sa gilid ng burol upang mamitas ng bunga ng punungkahoy at maglaro sa nasabing pook. Nabatid na bumigay mula sa kinalalagyan ng tinuntungan nilang malaking tipak na bato na gumulong-gulong pababa sa burol, ayon kay Aguilar. Mapalad na nakatalon ang dalawa pang kalaro habang sinawimpalad ang biktima na nadaganan ang ulo ng tinatayang may 500 kilong bato.