1 utas, 2 sugatan sa road mishap

BULACAN, Philippines – Kamatayan ang sumalubong sa drayber ng SUV habang bahagyang sugatan ang dalawang iba pa matapos na magbanggaan ang kanilang sasakyan sa madilim na bahagi ng Barangay San Roque, bayan ng San Rafael, Bulacan kahapon ng madaling araw.  Hindi na umabot pa ng buhay sa Baliwag District Hospital ang biktimang si Ronald Allan Matic, 43, ng Barangay Sta. Barbara, Baliwag, Bulacan habang  sumuko naman sa pulisya ang mga drayber na nakabanggaan nitong sina Brigido Palisoc, 49, ng Brgy. San Pedro, Bayabag, Nueva Viscaya; at Baltazar Calapis, 50, ng Brgy. Sibul sa Bayan ng San Miguel, Bulacan. Ayon kay PO3 Rypson Querijero,  nag-ovetake ang SUV (ZHH-521) ni Matic sa sinusundang sasakyan nang mawalan ito ng kontrol sa manibela kaya sumalpok sa kasalubong na sasakyan nina Palisoc at Calapis pagsapit sa Cagayan Valley Road sa nasabing barangay. Sugatan naman naisugod sa ospital sina Palisoc at Calapis.