Buy-bust nauwi sa pagkakaligtas ng 7-anyos sa Cavite

MANILA, Philippines – Nauwi sa pagkakaligtas ng pitong-taong gulang na lalaki ang buy-bust operation ng mga awtoridad sa probinsiya ng Cavite.

Nasakote ng mga pulis ang tatlong suspek na sina Salvacion Abagon, 42; Julius Abago, 33; at Jason Angeles, 39 sa isang sting operation sa Brgy. Ibayo Estacion, Naic, Cavite.

Bukod sa pagtutulak ng droga ay ibinuking ni Abagon ang pandurukot nila sa isang batang taga General Trias, Cavite noong Pebrero 10.

Matapos malaman ang kalagayan ng bata ay nagtungo ang Anti- Kidnapping Group ng Philippine National Police sa kuta ng mga suspek sa Tramo, Ibayo Estacion, Naic, Cavite nitong Lunes ng gabi.

Nahaharap sa kasong paglabag ng Republic Act 9165 o Comprehensive Dangerous Drugs Act ang tatlong suspek.

Bukod dito ay kakasuhan din ng kidnaping sina Abagon, Abago, at Angeles na pawang nakakulong ngayon sa Naic municipal police.