2 utas sa karambola ng sasakyan
LEGAZPI CITY, Albay , Philippines – Dalawa-katao ang iniulat na namatay habang tatlong iba pa ang malubhang nasugatan makaraang magkarambola ang tatlong sasakyan sa kahabaan ng Maharlika Highway sa bayan ng Camalig, Albay kahapon ng madaling-araw.
Hindi na umabot ng buhay sa ospital ang mga biktimang sina Mario Herrera, 53; at Jose Nero, 38, habang sugatan naman sina Orlando Nator, driber ng jeepney; at Elisa Bacate, pasahero ng bus at nakatira sa Tacloban City.
Sa ulat ni P/Chief Insp. Frandy Echaluce, hepe ng Camalig PNP, nagkarambola ang mga sasakyang PP Bus Liner (TYX 432) ni Ricky Milliones ng San Isidro, Leyte; jeepney (EBH 922) ni Nator; at ang trak (RND 632) ni Rico Givera.
Lumiltaw na sinalpok ng bus na patungong Maynila ang pampasaherong jeepney na patawid mula sa Barangay 7. Sinalpok naman ng jeepney ni Nator ang trak ni Givera kung saan namatay ang dalawang pasahero. Gayon pa man tumakas ang driver ng bus na si Milliones.
- Latest
