Biyudo nakipag-date sa textmate, todas

MANILA, Philippines - Dahil sa sobrang kagalakan matapos makipag-date sa ka-textmate na dalaga, namatay ang 55-anyos na biyudo makaraan itong atakehin sa puso  sa Capitol Site, Ipil Height, bayan ng Ipil, Zamboanga Sibugay kamakalawa ng umaga.

Sa ulat na nakarating sa Camp Crame, naganap ang insidente bandang alas-5:31 ng umaga matapos na makipag-date ang biktimang si Reynaldo Ducosin sa kaniyang ka-textmate na si Santanina Arola, 25, ng Brgy. Magdaup.

Napag-alamang nagkasundo ang magka-textmate na magkita para sa kanilang unang date kung saan sinabi ng biktima na ipapasyal niya ang ka-textmate.

Sa sobrang galak matapos na makita ng personal ang magandang  ka-textmate ay agad na pinaangkas ng biktima sa kanyang motorsiklo para mamasyal.

Gayon pa man, ilang metro pa lamang ang naiilayo ay biglang nakaramdam ng paninikip ng dibdib at paghinga ang biktima kaya pinabagal nito ang motorsiklo kung saan sumemplang sa tabi ng kalsada.

Nagtamo naman ng bahagyang galos ang dalawa bunga ng insidente kung saan ay idineklarang patay sa ospital ang biyudo na nakatira sa Barangay Namnama, bayan ng Titay.