Farm owner kinatay, pinugutan

MANILA, Philippines - Brutal na kamatayan ang sinapit ng 60-anyos na farm owner matapos itong pagtatagain ay pinugutan pa ng berdugong di-kilalang lalaki kamakalawa ng hapon sa bahagi ng Barangay Tumitus, Zamboanga City.

Sa police report na nakarating kay P/Chief Insp Ariel Huesca na isinumite sa Camp Crame,  naganap ang pamamaslang bandang alas-2:30 ng hapon sa may ilang metro ang layo sa farm ng biktimang si Marino Guevarra ng Sitio Tungalip sa nabanggit na barangay.

Ang pugot na ulo ng biktima ay natagpuan sa madamong bahagi na may 15-metro ang layo sa katawan nito.

Nabatid na kagagaling lamang ng biktima sa pagbisita sa pag-aari nitong farm kung saan pauwi na ito nang harangin ng di-kilalang lalaki.

Pinagtataga ang biktima na hindi pa nakuntento ay tinagpas pa ang ulo nito saka nagmamadaling tumakas sa crime scene.