Tinedyer nabuntis ang gf, nagbigti

CAVITE, Philippines — Pinaniniwalaang problema sa pananalapi at di-inaasahang pagbubuntis ng kasintahan, nagpasalubong na lamang kay kamatayan ang 18-anyos na binata matapos itong magbigti sa likuran ng kanilang tahanan kahapon ng umaga sa Barangay Banay Banay sa bayan ng Amadeo, Cavite.

Bandang alas-7 ng umaga nang matagpuang nakabitin ang biktimang si Michael Magdamit, helper sa pribadong kompanya, ng Sitio Pulong Katyog sa nasabing barangay.

Huling namataang buhay ang biktima na nakikipag-inuman sa dalawang tiyuhin na sina Bernard Publico at Salvador Ortacio kung saan naikuwento nito ang matinding problema na maagang pagbubuntis ng kanyang girlfriend.

Gayon pa man, pinayuhan ng dalawang tiyuhin ang biktima kung saan pinalubag ang loob nito na kakayanin ang nasabing problema.

Inakala naman nina Publico at Ortacio na napayapa ang biktima sa kanyang problema hanggang sa magpaalam na ito na uuwi kung saan kinaumagahan ay natagpuan ng amaing si Roberto Morundo ang katawan ni Michael na nakabitin sa punung kahoy sa likuran ng kanilang bahay.