Lolo tinodas sa b-day ng apo

TUGUEGARAO CITY, Philippines - Bumulagta ang 60-anyos na lolo matapos ratratin ng kanyang kainuman sa kaarawan ng kanyang apo sa liblib na bahagi ng Sitio Marantan, Barangay Bagu sa bayan ng Abulug, Cagayan kamakalawa.

Naisugod pa sa Ballesteros District Hospital subalit namatay din ang biktimang si Tomas Hipolito, mangingisda at nakatira sa bayan ng Luna, Apayao habang tinutugis ng pulisya ang suspek na si Terry Marantan, 33.

Samantala, sugatan naman ang lolang si Virgina Oliva, 72, matapos tamaan sa ulo ng ligaw na bala kung saan naisugod sa Cagayan Valley Medical Center.

Lumalabas sa imbestigasyon na nagkainitan ang biktima at suspek sa inuman na nauwi sa pamamaril.

Nagkagulo at nagsitakbuhan ang mga bata na dumalo sa children’s party matapos umalingawngaw ang serye ng putok ng baril habang patuloy naman ang imbestigasyon ng pulisya.