2 dedo sa killer truck

TUGUEGARAO CITY, Philippines - Dalawa-katao ang iniulat na nasawi habang apat naman ang kritikal ang kalagayan matapos salpukin ng truck ang tindahan sa Barangay Alba sa bayan ng Baggao, Cagayan, ayon sa pulisya. Kinilala ng pulisya ang nasawing truck driver na si Maximo Gludobe Jr., 36, tubong Tarlac City at ang laborer na si Crisanto Javier ng EVI Construction na gumagawa ng road concreting project sa nasabing lugar. Kritikal naman na naisugod sa Cagayan Valley Regional Medical Center ang apat na sina Jerry Tapulao, Joel Vista, Manuel Soduesta at ang may-ari ng tindahan na si Imelda Ramos. Lumalabas sa imbestigasyon na pababa ang truck na kargado ng semento nang mawalan ng kontrol ang driver at nagtuluy-tuloy na sumalpok sa tindahan. Umaabot sa P.8 milyong halaga ng ari-arian ang napinsala.