SANTIAGO CITY, Isabela, Philippines – Sinibak sa puwesto ang dalawang pulis matapos makatakas ang notoryus na drug pusher na kanilang binabantayan sa Ilocos Norte, ayon sa ulat kamakalawa. Ayon kay P/Senior Supt. Marlou Chan, Ilocos Norte PNP director, ang dalawang sinibak na sina PO3 Joey Aninag at PO2 Sigman Benigno na kapwa miyembro ng provincial anti-illegal drugs special operations task group. Bagama’t nadakma rin ang pumugang si Omar Mato sa tulong ng Muslim community sa nasabing lalawigan ay may kahaharapin pa rin sa mga kaukulang kaso ang dalawang pulis. “They could even be dismissed from the service if proven they are guilty of letting the suspect loose,” pahayag ni Chan.