3 bagets nalunod sa ilog

BATANGAS, Philippines  - Tatlong binatilyo ang iniulat na namatay matapos malunod habang nanghuhuli ng talangka sa Pansipit River sa bayan ng Agoncillo, Batangas kamakalawa ng umaga.

Kinilala ang mga biktima na sina King David Cuarto, 12; George Francis Ferea,14; at si Edgar John Cabrera,14 pawang mga nakatira sa Barangay Bagong Sikat sa nabanggit na bayan.

Ayon sa police report, naliligo ang mga biktima habang nanghuhuli ng talangka sa nasabing ilog sa Barangay Pansipit nang tangayin ng malakas na agos ng tubig.

Unti-unting nilamon ng tubig hanggang sa tuluyan malunod bandang alas-10:45 ng umaga.

Matapos ang ilang oras na pagsagip sa mga biktima, isinugod pa sa Batangas Provincial Hospital subalit idineklarang patay ni Dra. Divina Landicho.

“Hindi naman masama ang panahon ng maganap ang insidente, sadya lang talagang malakas ang current ng ilog kaya sila tinangay sa malalim,” kwento ng isang residente.