SAN JOSE DEL MONTE CITY, Bulacan, Philippines – Kalaboso ang tatlong pinaghihinalaang notoryus na holdaper matapos na maaresto ng pulisya sa magkahiwalay na operasyon sa lungsod na ito kahapon ng madaling araw.
Kinilala ang mga nasakoteng suspek na sina Resty Villaruel, 23; Ferdinand Haloc, 21 at Ryan Carlo Feliciano, 21 ng Brgy. Gumaoc East na tinamaan ng bala sa hita matapos na manlaban sa mga awtoridad.
Base sa ulat ni P/Supt. Reniel Valones, dakong ala-1:45 ng madaling araw nang holdapin ng mga suspek ang mga pasahero ng jeepney sa bisinidad ng Brgy. Sto. Cristo ng lungsod.
Habang nagsusuplong sa himpilan ng pulisya ay tinawagan ng isa sa mga biktima ang kinulimbat na cellphone at nagkunwaring tutubusin ang simcard nito sa halagang P5,000 na kinagat naman ng mga suspek na sina Haloc at Villaruel na inaresto ng mga nakaposteng pulis.
Samantalang ang suspek na si Feliciano ay nasakote naman habang nambibiktima sa terminal ng bus sa Brgy. Bagong Buhay II ng lungsod na tinamaan ng bala sa hita matapos na pumalag sa parak na nagkataong nasa lugar.