Barangay councilor itinumba

QUEZON, Philippines - Napatay ang 49-anyos na konsehal ng barangay matapos na barilin ng kanyang kaalitang kapitbahay sa Barangay Batabat Norte sa bayan ng Buenavista, Quezon kamakalawa ng umaga. Napuruhan sa ulo ang biktimang si Zosimo Cabida habang nasakote naman ang isa sa suspek na si Daniel Leogo, 65. Kasalukuyan namang tinutugis ng pulsya ang isa pang suspek na si Leo Ramos. Sa ulat ni SPO1 Eugenio Antes Jr., nakipagkita sa suspek ang misis ng biktima na si Luvella Cabida sa barangay hall upang ayusin ang alitan laban sa kanyang mister. Sa halip na makipag-ayos ay tumanggi ang suspek kung saan sinundan pa nito si Luvella. Tinangkang barilin ng suspek ang anak ng biktima subalit pumalya ang baril kaya lumabas ng bahay dahil sa komusyon. Dito na natiyempuhang barilin ng suspek ang biktima.