TUGUEGARAO CITY , Philippines - Pinaniniwalaang selos ang isa sa motibo kaya niratrat at napatay ang 24-anyos na miyembro ng Citizen’s Armed Forces Geographical Unit (Cafgu) ng kanyang kabaro sa loob ng kampo sa Barangay Dyetban, San Guillermo, Isabela noong Linggo ng gabi. Kinilala ng pulisya ang napatay na si Reynaldo Castañeda ng Barangay Dipacamo sa nasabing bayan. Lumilitaw na tiyempuhang natutulog ang biktima sa barracks nang pasukin at pagbabarilin ng suspek na si Wilfredo Mondejar, 42, ng Barangay Colorado. Sinasabing inubos ng suspek ang bala ng kanyang M14 Armalite Rifle sa katawan ng biktima na hindi na nagising. Sumuko naman ang suspek sa kanilang commanding officer na si S/Sgt. Ernesto Bayan matapos ang pamamaril.