Retired pulis nawawala, 5 pa sugatan sa tumaob na bangka

CAMP SIMEON OLA, Legazpi City ,Philippines – Isang reteradong pulis ang nawawala habang nakaligtas naman ang 5 kasamahan nito matapos na sirain ng malalaking alon ang kanilang bangka sa karagatan ng Marcedez, Camarines Norte kamakalawa ng gabi.

Nakilala ang nawawalang pulis na si Ret. SPO2 Ceferino Abina Caballero samantala ang mga nakaligtas ay kinilalang sina Iluminado Vasquez , Danilo Vasquez, Jonathan Lucilo, Rolly Berga at isa pang hindi nakikilalang na pawang mga mangingisda at mga residente ng naturang lugar.

Batay sa ulat, naganap ang aksidente dakong alas 8:00 kamakalawa ng gabi habang ang mga biktima ay sakay sa isang bangka habang papadaong ng hampasin ng malalaking alon hanggang sa mahati ang bangka at lumubog.

Agad na nagtalunan ang mga lulan nito hanggang sa makaligtas ang mga ito bukod kay Caballero. Nagsagawa agad ng search and rescue operations ang ilang residente subalit hindi makita ang retiradong pulis.