Binatilyo utas sa pagtatanggol sa gf

MANILA, Philippines - Nagbuwis ng buhay ang isang 16-anyos na binatilyo matapos pagbabarilin ng 'di-kilalang lalaki na nagtangka pang molestiyahin ang girlfriend nito habang namamasyal ang magkasintahan sa seawall ng Brdco Port sa Bacolod City, Negros Occidental kamakalawa ng hapon.

Idineklarang patay sa Corazon Montelibano Memorial Regional Hospital sa tinamong tama ng bala ng 9mm sa ulo ang biktimang si Joshua Bornales ng Barangay Taculing.

Sa ulat ng Bacolod City PNP na nakarating sa Camp Crame, dakong alas-2:30 ng hapon habang namamasyal ang magkasintahan nang harangin ng isang di-kilalang lalaki pagsapit sa madilim na lumang resto grill restaurant.

Kaagad nagdeklara ng holdap ang suspek kung saan tinangka pang molestiyahin ang dalagita kaya ipinagtanggol naman ng bikitma na nanlaban ang binatilyo sa holdaper kaya napilitang barilin ito sa kanang bahagi ng ulo na naglagos sa kaliwa.

Tinangka ring barilin ng holdaper ang dalagita pero nanlaban ito hanggang sa kumalas ang magazine ng bala ng baril.

Nagtatakbo palayo ang dalagita kung saan nakahingi ng tulong sa mga bystander na siyang nagsama rito sa himpilan ng pulisya.