Mag-asawa itinumba sa barangay hall

ALAMINOS CITY, Pangasinan, Philippines – Isinama ni kamatayan sa pagdiriwang ng Undas ang hepe ng pulisya at asawa nito makaraang pagbabarilin ng utol na lalaki ng una sa loob ng Pandan Barangay Hall sa Alaminos City, Pangasinan kahapon ng umaga.

Tinadtad ng bala ng M16 Armalite Rifle ang mag-asawang sina P/Supt. Llyod Millan, hepe ng pulisya sa bayan ng Bayambang, Pangasinan at Cheryll Tarife Millan, 34.

Tugis naman ng pulisya ang suspek na si Lyndon Millan na sinasabing nakatatandang kapatid ni P/Supt Millan.

Ayon kay P/Supt. Rollie Saltat, hepe ng pulisya sa Alaminos City, nagtungo ang mag-asawang Millan kasama ang barangay chairman sa nasabing lugar para ayusin ang sigalutan sa lupaing pinagtatalulan ng mag-utol na Millan.

Pagdating ng mag-asawa sa loob ng barangay hall ay kaagad na pinagbabaril ng suspek kung saan hindi naman nadamay ang barangay chairman na hindi pinangalanan.

Naisugod naman sa Western Pangasinan District Hospital ang mag-asawa subalit idineklarang patay na ng mga doktor.