Mag-asawa, 1 pa minasaker

MANILA, Philippines - Brutal na kamatayan ang sinapit ng mag-asawang magsasaka at ng 14-anyos na pamangking lalaki matapos na ratratin ay pinagtataga pa ng mga armadong kalalakihan sa liblib na bahagi ng Barangay Poblacion sa bayan ng Talakag, Bukidnon kamakalawa ng gabi. Sa phone interview, kinilala ni P/Inspector Adolfo Mercado ang mga napaslang na sina Joel Arban, 46; Mirriam Arban, 31; at si Kim Oligario, 14. Isa naman ang nakaligtas matapos na magtago sa cabinet na tumanggi munang tukuyin ni Mercado habang patuloy na tinutugis ang mga suspek. Sa imbestigasyon, bandang alas-10:20 ng gabi nang pasukin ng tatlong armadong lalaki ang tahanan ng mga biktima kung saan niratrat ang mga ito habang natutulog. Hindi pa nakuntento ay pinagtataga rin ito na halos humiwalay ang mga bahagi ng katawan. Sa kasalukuyan, tumanggi muna ang opisyal na tukuyin ang pagkakakilanlan sa mga suspek.