CAMP VICENTE LIM, Laguna, Philippines — Dalawang notoryus na miyembro ng carjacking gang ang iniulat na napatay matapos makipagbarilan sa pulisya sa inilatag na checkpoint sa Biñan City, Laguna kahapon ng madaling-araw.
Lumilitaw na nagsasagawa ng Oplan Sita at Oplan Galugad ang mga operatiba ng PNP nang maganap ang shootout.
Bandang alauna ng madaling-araw nang masabat ng mga operatiba ng pulisya ang mga suspek sa inilatag na checkpoint malapit sa Amordon Subdivision sa Brgy. Canlalay kung saan tumangging huminto ito.
Lumilitaw na agad pinaputukan ng dalawa ang mga pulis na nagbabantay sa checkpoint na nauwi sa shootout sa pagitan ng magkabilang panig.
Ilang saglit pa, kapwa tumimbuwang ang dalawang carjacker na lulan ng motorsiklo kung saan ay inaalam pa ang pagkakakilanlan ng mga napatay.
Narekober sa mga bangkay ang dalawang cal. 38 revolver at dalawang motorsiklo na pinaniniwalaang ninakaw.