Hayskul stude dedo sa titser
MANILA, Philippines – Isang 15-anyos na high school student ang iniulat na nasawi matapos aksidenteng mabaril ng isang guro na sinasabing nairita nang hindi paawat ang dalawang grupo ng mga pasaway na kabataang estudyante sa pag-aaway sa harapan ng eskuwelahan sa General Santos City, South Cotabato kamakalawa.
Kinilala ang napatay na si Kenneth Dave Edil ng City Heights sa nabanggit na lungsod at junior high school student sa Ireneo Santiago High School.
Arestado at pormal na kinasuhan ang suspek na si Ismael Garvida na nakumpiskahan ng isang cal. 38 revolver na ginamit nito sa pamamaril.
Base sa police report na nakarating kahapon sa Camp Crame, naganap ang krimen sa harapan ng nasabing eskuwelahan dakong alas-11:20 ng tanghali.
Lumilitaw na kalalabas lamang ni Garvida sa gate ng eskuwelahan nang mabungaran nito ang dalawang grupo ng kabataang estudyante na nag-aaway.
Nabatid na tumangging paawat ang dalawang grupo ng kabataan matapos mamagitan ang guwardiyang si Jocelyn Ylanan.
Gayon pa man, sinigawan ng nasabing guro ang magugulong estudyante subalit patuloy pa rin ang suntukan ng mga ito kaya dito na napuno ang guro at inagaw ang baril ni Ylanan saka nagpaputok ng warning shot upang matigil.
Dito na bumulagta si Edil at idineklarang patay sa St. Elizabeth Hospital matapos tamaan ng bala sa katawan. Habang patuloy naman ang pagsisiyasat.
- Latest
- Trending
