CAMP SIMEON OLA, Legazpi City, Philippines — Malagim na kamatayan ang sinapit ng mag-asa at tatlo nitong anak matapos makulong sa kanilang bahay na nasunog sa Barangay Santiago Old sa bayan ng Nabua, Camarines Sur kamakalawa ng gabi.
Kabilang sa namatay ay ang mag-asawang Anastacio Parina, 68; Normida Parina, ang mga anak na sina Alvin, 5; Erlinda, 3; at si Vincent, 1.
Batay sa police report, naganap ang sunog dakong alas-11 ng gabi habang natutulog ang mga biktima sa loob ng kanilang bahay na sinasabing pagawaan ng kutson.
Nabatid na hindi na nakalabas pa ang mga biktima dahil sa pagkalat ng apoy sa nabanggit na lugar kung saan mabilis naman na rumesponde ang mga miyembro ng pamatay-sunog.
Tumagal ng ilang oras ang sunog bago maapula at natagpuan ang limang miyembro ng pamilya na magkakasama sa kuwarto.
Sa inisyal na imbestistigasyon, lumilitaw na electrical short circuit ang isa sa dahilan ng sunog habang patuloy naman ang pagsisiyasat.