MANILA, Philippines - Dinukot ng mga armadong kalalakihan ang estudyanteng anak ng nagwaging barangay chairwoman sa Barangay Mahayahay, Iligan City, Lanao del Norte noong Biyernes ng hapon. Kinilala ng pulisya ang kinidnap na si Edris Polala, 21, estudyante ng Iligan Computer Institute, at nakatira sa Purok Gumamela. Si Polala ay anak ni Chairwoman Hadi Saripa Polala na nagwagi noong barangay eleksyon sa Brgy. Sumbag, Bayang, Lanao del Sur laban sa katunggaling si Abdul Malik Hamdag. Naganap ang pagdukot habang pauwi na ang biktima dakong ala-una y medya ng hapon kung saan isinakay sa berdeng Adventure na walang plaka at tumahak sa direksyon ng Jeffrey Road. Ilang oras matapos na dukutin ang biktima ay kumontak naman ang mga kidnaper at nag-demand sa kapatid nitong si Salahuddin Polala na palalayain lamang nila ang bihag kung bababa bilang chairwoman si Saripa at iluluklok sa puwesto ang tinalo nitong si Hamdag. Sinasabing ang biktima ay dinukot sa kautusan mismo ng pamilya ni Hamdag kung saan ang kaso ay iniimbestigahan na ng mga awtoridad.