MANILA, Philippines – Dahilan sa mababang grade sa Math, isang high school student ang nag-suicide sa pamamagitan ng pagbibigti sa loob ng kanilang tahanan sa Silay City, Negros Occidental kamakalawa.
Ayon sa ulat ng pulisya, ang biktima na itinago sa pangalang Suzette, 15-anyos, 3rd year high school sa Doña Monserrat Lopez Memorial High school.
Bandang alas-4 ng hapon ng madiskubre ng kuya nito ang nagbigting kapatid sa tahanan ng kanilang lolo at lola kung saan ang mga ito nakikituloy para malapit lamang sa kanilang pinapasukang eskuwelahan.
Inakala umano nito na natutulog ang biktima kaya ibinukas nito ang bintana at napasigaw ito ng makitang nakabigti ang kapatid sa kisame na nakatali ng kumot.
Isang suicide note naman ang natagpuan sa loob ng kuwarto ng biktima ng mga nagrespondeng Scene of the Crime Operatives (SOCO) team ng Silay City Police na humihingi ng tawad sa kanyang mga magulang at kapatid dahil hindi nito matutupad ang kanyang pangarap makaraang makakuha ng 78 na grade sa Math.
Sinabi rin nito na mahal na mahal niya ang kaniyang pamilya at lubha siyang nahihiya dahilan binigo niya ang mga ito sa inaasahan sa kaniya na maging ‘honor student.
Nabatid na ang biktima ay nasa top 5 sa kanilang klase subali’t dahilan 78 ang nakuha nitong grade sa Math ay matatanggal na ito sa ‘honor roll’ sa kanilang klase.