MANILA, Philippines - Nalalagay sa balag ng alanganing mabulok sa kulungan ang dating kagawad ng barangay makaraang kasuhan ng 3 counts ng rape at abduction ng isang estudyante sa Tanauan City, Batangas.
Kasalukuyang nirerebisa sa Office of the City Prosecutor’s sa Sta. Rosa City, Laguna ang kasong rape ni Joselito Magpantay ng Barangay Janopol Oriental, Tanauan City, Batangas.
Ayon kay Atty. Falconi V. Millar, pro-bono lawyer ng biktima, 3-beses isinagawa ang panghahalay sa suspek simula noong Agosto 24, 2009.
Base sa affidavit, lumilitaw na niligawan ng suspek ang biktima subalit tinanggihan niya dahil may-asawang tao kung saan nauwi sa pananakot.
Gayon pa man, napilitang makipagkita ng biktima noong Agosto 24, 2009 hanggang sa painumin siya ng canned soda at mawalan ng malay hanggang sa maganap ang maitim na balak ng suspek.
Noong Enero 16, 2010 ay inabangan at pilit na isinakay sa kotse ang biktima matapos tutukan ng baril ng suspek kung saan pinagbantaan idadamay ang kanyang pamilya kaya muling naganap ang panghahalay.
Noong Hulyo 22, 2010 ay muling naganap ang krimen kung saan kinunan pa ng larawan ang biktimang hubo’t hubad sa pamamagitan ng cell phone at ipinakalat. Hindi nagsumbong ang biktima dahil sa takot na patayin ang kanyang pamilya pero kinompronta siya ng mga magulang noong Sept. 5 dahil sa natanggap na mga MMS ng kanilang mga kaanak kung saan ay hubo’t hubad ito kaya naman napilitan nang kumanta at nagharap ng kaso laban sa suspek sa tulong ni Atty. Millar.