MANILA, Philippines – Napaslang ang isang intelligence operative ng pulisya makaraang pagbabarilin ng mga rebeldeng New People’s Army sa harapan ng eskuwelahan sa bayan ng Maco, Compostela Valley kahapon ng umaga. Idineklarang patay sa Davao Regional Hospital sa Brgy. Apokon, Tagum City, Davao del Norte si SPO1 Judil Chavez matapos mapuruhan ng bala sa ulo. Lumilitaw na inihatid ng biktima ang kanyang anak sa Maco Heights Central Elementary School sa Barangay Poblacion nang lapitan at ratratin ng motorcycle-riding gunmen. Lumilitaw na bago ang pamamaslang ay nakatanggap ang biktima ng pagbabanta mula sa grupo ng NPA rebs.