CAMP SIMEON OLA, Legazpi City, Philippines — Isang kagawad ng pulisya ang malubhang nasugatan ng maganap ang isang misencounter ng mga ito sa grupo ng mga sundalo kahapon ng madaling-araw sa Barangay Casabangan, Pio Corpuz, Masbate.
Nakilala ang biktima na si PO1 Zosimo Baterna at nakatalaga sa Pio Corpuz municipal police station.
Ayon sa ulat, nagsasagawa ng operasyon ang pulisya sa pangunguna ni Insp. Joenel Moratalla, hepe ng pulisya sa Pio Corpuz town, bandang alas-4:35 ng madaling- araw kahapon ng maka-engkuwentro nila ang grupo ng sundalo mula sa Charlie Company ng 9th Infantry Batallion na nagsasagawa din ng operasyon laban sa mga rebeldeng NPA.
Iniimbestigahan ng mga awtoridad ang pangyayari upang hindi na maulit ang nasabing misencounter ng pulisya at mga sundalo.