Obrero pinatay sa gulpi ng 3 'pulis'

BULACAN, Philippines — Napas­lang ang isang 33-anyos na obrero makaraang pag­tulungang gulpihin ng tat­long armadong lalaki na si­nasabing mga pulis-Ca­loocan sa Barangay San Manuell, San Jose Del Monte City, Bulacan kama­kalawa ng hapon.

Kinilala ng pulisya ang napatay na si Nilo Tagulo ng Pangarap Village, Calo­ocan City habang nakilala naman ang mga suspek na sina PO1 Gerardo Garcia, at ang dalawang pulis na may apelyidong Mones, at Ortega ng pawang mga nakatalaga sa himpilan ng pulisya sa Caloocan City.

Lumilitaw sa imbesti­gasyon ni PO3 Menandro Policarpio, naglalakad ang biktima kasama si Manuel Alba sa bisinidad ng Pleasant Hills, nang harangin at tutukan ng baril ng tatlong suspek na nakasibilyan.

Gayon pa man, naka­takbo ang dalawa subalit hinabol ng mga suspek kung saan nakorner si Tigulo at pinagtulungang gulpihin.

Lingid sa tatlo ay nasak­sihan ni Alba ang insidente habang nakatago sa gilid ng sapa.

Naisugod pa sa East Avenue Medical Center sa Quezon City subalit nama­tay din ang biktima habang ginagamot.