MANILA, Philippines - Tatlong bata ang naratay sa pagamutan makaraang malason sa kinaing bunga ng tuba-tuba sa General Santos City kamakalawa. Kinilala ang mga biktima na sina John Mark Castillo, 7; Floramie Ayuban, 5; at Joshua Batiansila, 5, pawang residente ng Promise Land, Barangay Mabuhay ng lungsod. Sa ulat na nakarating kahapon sa Camp Crame, pasado alas-10 ng umaga habang naglalaro ang mga biktima sa kanilang bakuran ng mapagdiskitahang mamitas ng bunga ng tuba-tuba. Inakala umano ng mga biktima na isa lamang uri ng prutas ang naturang tuba-tuba kaya kinain nila ang buto ng nasabing halaman. Gayunman, ilang oras matapos na makain ang tuba-tuba ay nagsimula ng dumaing ng pananakit ng tiyan, ulo at pagsusuka saka matinding pagkahilo ang mga biktima bunsod upang isugod ang mga ito sa pagamutan.