Ina, 3 anak nalason sa kabute

MANILA, Philippines - Isang ina at tatlo nitong anak ang iniulat na nalason makaraang kumain ng ka­kaibang kabute na niluto para sa tanghalian kamakalawa sa Barangay Tinagacan sa General Santos City. Kinilala ang mga nalason na sina Delia Parcon, 47; Jurish Dave, 6; Maria Theresa, 18 at si Mark Anthony, 15, na pawang residente ng Purok 15 sa nabanggit na barangay. Sina Maria Theresa at Mark Anthony ay hindi naman naisugod sa General Santos District Hospital matapos kumain ng kinayod na niyog na nilagyan ng maraming asukal bilang paunang lunas. Lumilitaw na iniulam ng mag-iina sa pananghalian ang kabuteng kinuha ng ina mula sa niyugan. Gayon pa man, makalipas ang 3-oras matapos kumain ay nakaramdam na ng pananakit ng tiyan at pagsusuka ang mag-iina. Pinaniniwalaan namang ligaw na kabute na tumubo sa dumi ng hayop ang nakain ng mag-iina.