300 kawani ng kapitolyo pinalis

BULACAN, Philippines — Aabot sa 300 kontraktwal ng kapitol­yo ng Bulacan ang iniulat na mawawalan ng trabaho simula sa Huwebes.

Ito ay dahil magtatapos ngayon ang 7-araw na pa­lu­git na ipinagkaloob sa ka­nila makaraang magta­pos ang kanilang kontrata no­ong Hunyo 30.

Base sa PHRMO -2010-11 na may petsang Hulyo 1 ni Cynthia Abiol, hepe ng Provincial Human Resource Management Office, ang mga pinuno ng tanggapan at mga kawaning pansaman­tala, casual, at job order na katayuan ay binigyan ng 7- araw na ekstensyon na matatapos sa Hulyo 7.

Hindi naman kasama sa sinibak ang mga kawani na nasa pampublikong paga­mutan sa Bulacan.

Ayon sa memorandum, maaari pa ring mag-apply sa kanilang binakanteng po­sisyon ang mga kawa­ning sinibak sa trabaho.

Pansamantalang isinan­tabi muna ang pagtatanggal sa may 180 kawani ng mga pagamutan na kinabibila­ngan ng mga doktor at nurse dahil lubhang kailangan ang serbisyo ng mga ito.

Dahil dito, umaabot la­mang sa 280 posisyon ang mababakante simula sa Huwebes.

Kabilang sa mga maba­bakanteng posisyon ay ang mga tanggapan ng environment and natural resources, legal, assessor, provincial warden, civil security, provincial administrator, chief of staff, provincial public affairs office, at general services office.

Kaugnay nito, patuloy naman ang paghahanap ni Bulacan Gob. Willy Al­varado ng mga taong may kakayahan na ma­aring mamuno sa mga nabanggit na tang­ga­pan.