BATANGAS , Philippines — Nanlumo ang isang lady TV reporter at kapatid nito matapos mabiktima ng Bukas-Kotse Gang sa compound ng simbahan sa Barangay Poblacion sa bayan ng Ibaan, Batangas kamalawa.
Dumulog sa himpilan ng pulisya sina Tina Ganzon ng ABS-CBN TV 10 - Batangas at ang kanyang kapatid na si Fides Ganzon, isang opisyal ng banko matapos matangayan ng mga personal na gamit at malaking halaga mula sa loob ng kanilang kotse.
Lumilitaw sa imbestigasyon na katatapos lang magsimba ng mag-utol sa St. James the Great Parish Church nang madiskubre na basag na ang salamin ng kanilang Toyota Vios bandang alas-5 ng hapon.
Kabilang sa natangay na mga gamit ay ang laptop, external hard drive, dalawang cell phone, mga bag at pitaka na may mga credit card, ID at P30,000.
Handa naman magbigay ng P50,000 pabuya ang pamilya Ganzon sa sinumang makakapagsauli ng kanilang mga gamit partikular na lang ang external hard drive ng laptop at mga ID. Arnell Ozaeta