BULACAN, Philippines — Brutal na kamatayan ang sinapit ng isang babaeng buntis na pinaniniwalaang may kapansanan sa pag-iisip makaraang gahasain at binigti pa ng ‘di-kilalang lalaki saka itinapon sa ilog sa Barangay Ibayo sa bayan ng Marilao, Bulacan kamakalawa.
Inilarawan ni PO2 Enrique Areja ang biktima na nasa edad 25 hanggang 30-anyos, mahaba ang buhok, katamtaman ang pangangatawan, nakasando at walang saplot sa ibabang bahagi ng katawan. Bandang alas-8 ng umaga kahapon nang matagpuan ng mga residente ang bangkay ng biktima na nakalutang sa ilog sa nabanggit na barangay.
Lumilitaw sa pagsusuri ng mga tauhan ng Scene of the Crime Operatives (SOCO) na may limang buwang buntis ang biktima at may palatandaang hinalay at binigti bago itinapon sa ilog. Ayon sa pulisya, huling namataang buhay ang biktima sa bahagi ng Barangay Ibayo ilang oras bago matagpuang patay.
Kasalukuyang nakalagak ang mga labi ng biktima sa punerarya sa Barangay Lolomboy kung saan patuloy naman ang follow-up operation ng pulisya. Boy Cruz at Dino Balabo