Police official sa Abra sinibak dahil sa shoot fest

CAMP BADO DANG­WA, Benguet, Philippines — Sinibak sa puwesto ang police provincial director ng Abra mata­pos magpasimuno ng shoot fest sa unang araw na pina­iiral ang Comelec gun ban.

Kinilala ni P/Chief Supt. Orlando Pestano, regional di­rector ng Cordillera Administrative Region, ang opisyal na si P/Supt. Charlo Collado kung saan sasa­ilalim din sa imbestigasyon dahil sa paglabag nito sa Comelec gun ban.

Napag-alamang gina­nap ang shooting competition sa pamumuno ni Colla­do sa loob mismo ng ba­kuran ng kaibigan niyang pulitiko sa Abra.

Pinaiimbestigahan na ni PNP Chief Director General Jesus Verzosa, si Col­lado dahil sa hindi pag­respeto sa Comelec gun ban.

“Kesa naman daw si General Pestano ang im­bestigahan at maputukan, si Collado na ang sinibak,” ayon sa source mula sa nabanggit na kampo.

Sinasabing si Collado, kasama ang ilang pulis at mga alalay ng pulitiko ay lumahok sa shooting competition noong Enero 11 kahit mahigpit na utos ng PNP hierarchy na bawal na ang magdadala ng baril at ang pagsasagawa ng shooting competition dahil sa nala­lapit na halalan.

Pansamantalang ba­kante ang nabanggit na pu­westo dahil kailangang ku­muha ng clearance sa Comelec bago magtalaga ng opisyal ng pulisya su­balit may kumakalat na balita na si P/Senior Supt. Ernesto Gaag, hepe ng Regional Mobile Force Group ng Cordillera ang sinasabing ipapalit kay Collado. Myds Supnad