3 big-time drug dealer nalambat sa P1.7 milyong shabu sa mall parking

CAVITE, Philippines — Nalambat ng pulisya ang tatlo katao kabilang ang isang babae na pawang mga big-time dealer at tulak ng droga ng lalawigan sa inilatag na drug operation ng grupo kamakalawa ng gabi sa parking lot ng isang mall sa lungsod ng Gen Trias.

Arestado ang tatlong suspek na kinilalang sina alyas “Usman”, “Aguil” at “Camile”, pawang residente ng Gen. Trias City.

Dakong alas-8:50 ng gabi nang ilatag ng PDEA Regional Office 4A RSET 1, PNP Regional Drug Enforcement Unit  4A at General Trias Police ang buy-bust operation sa open parking lot ng isang kialalang mall sa Brgy. Tejero General Trias City.

Bago ang operasyon, ilang araw ring isinalang sa surveillance ang mga suspek. 

Narekober sa kanila ang may 250 gramo ng shabu na nakalagay lamang sa pulang paper bag na may standard value na P1,700,000.

Nakumpiska rin ang buy-bust money na ginamit sa operasyon at ang cellphone na gamit naman sa kanilang illegal na transaksyon.