Cavite blast: Drug pusher gutay, 4 pulis grabe

CAVITE, Philippines — Nagutay ang ka­tawan ng isang drug push­er na sinasabing mi­yem­bro rin ng private arm­ed group matapos na su­ma­bog ang granadang ha­wak nito na ikinasugat ng malub­ha ng apat na pulis habang isinisilbi ang warrant of arrest laban dito sa Ba­rangay De Ocampo sa Trece Martires City, Cavite kamakalawa ng gabi.

Kinilala ang nasawi na si Peter Paredes ng de Ocam­po Village habang isinugod naman sa Mark James Hospital at Santiago Medical Center ang mga sugatang sina PO3 Ro­derick Amores, PO3 Benjamin Espineli, PO1 Es­te­lito Bergado at si PO1 Rolando Cativo.

Sinasabing naputulan ng kaliwang kamay si PO3 Espineli habang si PO1 Rolando Cativo ay napu­tulan ng kanang daliri, nag­tamo din ng mga tama ng shrapnel ang buong kata­wan ng mga biktima

Ayon kay P/Senior Supt. Primitivo Tabujara, intelligence chief ng Region 4-A, maghahain sana ng search warrant na inisyu ni Judge Lirio Castigador ng Naic Regional Trial Court Branch 15 ang mga pulis sa bahay ni Peter Paredes sa Cavite nang bigla na­lang sumabog ang granada sa loob ng kan­yang ku­war­to sa Barangay De Ocampo.

Sinasabing nagtago sa ilalim ng kama si Paredes habang hawak ang granada nang sunggaban ito ng mga pulis at sumabog ang gra­nadang hawak ni Paredes bandang alas-7:45 ng gabi.

Naaresto naman sa ope­rasyon sina Policarpio Pa­redes, Cenon Mores at si Leo Manaig matapos ma­korner ng raiding team.

Sa talaan ng pulis, si Paredes ay sinasabing miyembro ng sindikato na nagtatago ng mga armas at granada kung saan sangkot din sa pagtutulak ng droga.

Narekober sa lugar ang isang M16 Armalite rifle, 2 granada, apat na magazine para sa M16 rifle, mga bala. Cristina Timbang, Arnell Ozaeta at Joy Cantos