MEYCAUAYAN CITY, Bulacan , Philippines — Umaabot sa halagang P800,000 halaga ng mga alahas at pera ang nakulimbat ng pinaniniwalaang mga miyembro ng akyat bahay gang sa isang 58 anyos na ginang at administrador ng isang dumpsite makaraang salakayin ang kanyang bahay sa isang lugar sa Barangay Tugatog kamakalawa ng gabi.
Kinilala ang biktima na si Asuncion Arenas, may-asawa, residente ng naturang bayan at nangangasiwa ng Lingunan Dumpsite sa Barangay Lingunan.
Ayon sa imbestigasyon umalis ang biktima dakong alas-7:00 ng umaga sa kanilang bahay at iniwan niya ang kanyang anak na babae at manugang. Ilang oras pa ang nakakalipas ay umalis din ang mag-asawa sa bahay. Sa pagbalik nila dakong alas-7:00 ng gabi ay nakita nilang bukas na ang main door nito at magulo ang lahat ng kagamitan sa loob ng pamamahay.
Nang imbestigahan nila ang kuwarto ng administradora ay nawawala na ang mga alahas at pera na nasa loob ng aparador. Boy Cruz