36 nawawala, 69 nailigtas... Barko lumubog: 6 pasahero dedo

BATANGAS CITY, Philippines — Aabot sa anim na pasahero kabilang na ang isang sang­­gol ang kumpir­ma­dong na­sawi habang 36 iba pa ang nawawala at 69 ang nailigtas ma­ka­raang lu­mubog ang bar­kong roll-on, roll-off (RORO) sa kara­gatang malapit sa may Verde Island, Sitio Agapito sa Batangas City, Ba­tan­gas noong Sabado ng gabi.

Kinilala ni Danny Ase­dillo, terminal supervisor ng Calapan Port ang mga na­sawi na sina Jenny Cabral Mutia, 36, ng Socorro, Oriental Mindoro; Lealyn Pe­ñaranda, 20, ng Pola, Oriental Mindoro; Angelica Barbara Balanza, 8-month-old baby; Jennilyn Gutier­rez, June Panagsayan at isang babae.

Pansamantalang inila­gak sa Funeraria Naujan sa Calapan ang mga na­sawi at dadalhin din sa Ba­tangas Port para makuha ng kanilang mga kaanak.

Samantala, habang gi­na­gawa ang ulat na ito na­wawala pa rin ang 36 pa­sahero na pinaghahanap ng mga tauhan ng Philippine Coast Guard at private shipping companies sa bisinidad ng Isla Verde sa Batangas at Chico Point sa Baco, Oriental Mindoro.

Sa inisyal na ulat ng Philippine Coast Guard, bandang alas-9:30 ng gabi nang maglayag ang M/V Baleno 9 mula sa Calapan Port at magsimulang tuma­gilid papakaliwa bandang alas-9:45 ng gabi hang­gang sa tuluyan na itong lumubog bago mag-alas-12 ng gabi.

Sa pahayag ni Lt. Commander Troy Cornelio, hepe ng Batangas Coast Guard, posibleng may pananagutan ang may-ari ng M/V Baleno 9 na Besta Shipping Lines matapos madiskubre na 20 pasa­hero at 16 crew member la­mang ang nakatala sa ma­nifesto taliwas sa kabu­uang sakay nito na 88-katao.

Batay sa salaysay ng mga nakaligtas, nakata­ gilid na ang barko sa kaliwa bago pa ito luma­yag mula Calapan Port patungong pantalan ng Batangas kung saan may lulan ding 10 cargo trucks, anim na 10-wheeler trucks, apat na cargo jee­ pney at isang pribadong sasakyan.

 “Posibleng over loaded kami ng sasakyan at mga pa­sahero kasi maraming namasko sa Mindoro,” pa­hayag ng survivor na si Alberto Perez.

“Akala ko mamatay na ako nang madaganan ako ng mga tao, buti nalang maliwanag ang buwan kaya nasundan ko kung saan ako dadaan papa­labas ng barko,” kwento ni Perez

Magsasagawa ng maritime inquiry ang kinauuku­lang ahensya ng pamaha­laan sa may-ari at mga tauhan ng nasabing barko para magpaliwanag sa na­ganap na trahedya. Dag­dag ulat nina Juancho Mahusay at Ed Amoroso