2 agaw-celpon arestado

BULACAN, Philippines – Gulpi sarado ang inabot sa taumbayan ng dalawang kalalakihan makaraang mang-agaw ng celpon sa dalawang estudyanteng babae na nag-aabang ng masasakyan sa bisinidad ng Barangay Caysio sa bayan ng Sta. Maria, Bulacan kamakalawa. Pormal naman nagreklamo sa himpilan ng pulisya ang dalawang biktima bago kinasuhan ang mga suspek na sina Ranilo Padilla, 30, ng Northville 3, Brgy. Batia at Gilbert Dionisio, 24, ng Pag-asa St., Brgy. Turo, Bocaue, Bulacan. Ayon sa ulat, hinablot ng mga suspek ang dalawang celpon ng mga biktima bago tumakas sakay ng motorsiklo na may plakang RT-1240. Kaagad naman naipagbigay-alam sa mga barangay tanod ang insidente kaya naharang sa bisinidad ng Barangay Sta. Cruz kung saan gulpi-sarado matapos manlaban ang mga suspek. Boy Cruz