CAMARINES NORTE, Philippines – Tila aktuwal na itinuro ng isang sex education teacher ang leksiyon nito sa isa niyang 15-anyos na estudyante matapos na mabuntis ng una ang huli at magkaroon ng bawal na relasyon sa lalawigang ito.
Ang suspek na si Renato Largo alyas “Ato,” 30 anyos, may asawa at anim na anak at residente ng Sto. Domingo, Vinzons, Camarines Norte ay sinampahan ng kasong paglabag sa RA 7610 o child abuse law at inaresto noong Agosto 7, 2009 ngunit nakalaya din nang maglagak ng P100,000 piyansa.
Natunton ang biktima sa tinutuluyan niyang boarding house na, rito, may isang buwan na silang nagsasama ng biktima bilang isang mag-asawa.
Gumamit pa ng ibang pangalan si Largo para hindi siya matunton ng mga magulang ng dalagita.
Hindi naman naisulong ang kasong abduction with rape sa piskalya dahil hindi pinilit ang biktima ngunit niloko pa rin umano nito ang dalagita sa pagsasabing dalawang taon na siyang hiwalay sa kanyang misis.
Gayunman, patuloy na humihingi ng tulong ang pamilya ng biktima dahil sa posibleng mabasura lang ang kasong isinampa laban sa suspek sa tanggapan ng Department of Education dahil tiyahin ng suspek ang principal ng pinagtatrabahuhan nitong paaralan. (Francis Elevado)