PANGASINAN, Philippines – Napaaga ang salubong ni kamatayan laban sa isang 26-anyos na Hapones makaraang makuryente habang nagsa-shower sa beach resort sa Barangay Ilog-Malino sa bayan ng Bolinao, Pangasinan noong Martes ng umaga.
Sa inisyal na imbestigasyon ng pulisya, lumalabas na naliligo si Kentaro Yoshida, 26, sa banyo sa inupahang kuwarto sa Garden Paradise Resort nang magsisigaw ito at humingi ng tulong.
Agad na narinig ni Rodolfo Concepcion, biyenan ng biktima, ang kanyang manugang kung kaya’t agad itong sumaklolo.
Sinikap ni Concepcion na iligtas ang kanyang manugang subalit pati ito ay na-ground kayat tumawag ito ng ilang staff sa resort upang patayin ang main switch ng kuryente. Isinugod si Yoshida sa Rillera Family Clinic subalit hindi na ito umabot ng buhay. Cesar Ramirez