Hepe ng PNP intel kinatay

BAYOMBONG, Nueva Vizcaya, Philippines – Pinagtulungang tagain hanggang sa ma­patay ng mag-utol na ma­tadero ang isang tinyente ng pulisya sa panibagong ka­rahasang naganap ka­ma­kalawa ng hapon sa bayan ng Solano, Nueva Vizcaya.

Animoy kinatay na ba­boy ang naging katawan ni P/Inspector Anselmo Dulin, 50, dating hepe ng Ma­­conacon PNP sa Isa­bela bago naging hepe ng intelligence section sa bayan ng Bayombong.

Sa pagsisiyasat ni PO3 Armalite Fabro, lumilitaw na sinalpok ng traysikel ni Julius Retonda ang liku­rang bahagi ng Nissan Stra­ta ng biktima sa kaha­baan ng highway ng Ba­rangay Bascaran.

Napag-alamang si Dulin ay magse-serve ng warrant of arrest sa bayan ng Bagabag nang maganap ang insidente.

Dito nagtalo ang dalawa hanggang sa umalis si Retonda na agad ding bu­malik kasama ang kanyang kapatid na si Ronald sakay ng motorsiklo at walang kaabug-abog na sinaga­saan ang biktimang naka­tayo sa gilid ng kanyang kotse.

Nang bumaliktad ang biktima ay agad na pinag­ta­taga at pinagsasaksak ng mag-utol na Retonda kung saan napuruhan sa ulo at mukha ang opisyal.

Nakatakas naman si Ro­nald, habang ang ka­patid na si Julius ay dinala sa ospital dahil sa sugat na tinamo sa pinagmulan ng krimen.