KIDAPAWAN CITY, Philippines – Isang 24-anyos na Koreana ang iniulat na dinukot ng mga armadong kalalakihan kamakalawa ng hapon sa bisinidad ng USM Avenue sa bayan ng Kabacan, North Cotabato.
Kinilala ng pulisya ang biktima na si Mafen Wo, hipag ni Atchan Wo na may-ari ng Atchan Enterprises at TFKC Enterprises sa Brgy. Poblacion.
Ayon kay P/Supt. Jose Calimutan, hepe ng Intelligence and Investigation Division sa North Cotabato PNP, nasa harap ng tindahan ang biktima nang lapitan at tangayin ng mga armadong kalalakihan bago isinakay sa puting Mitsubishi Lancer (MBG 174) na pag-aari ni Chairman Datu Abdul Karim Ontong Usman ng Brgy. Bagua-Dos sa Cotabato City.
Samantala, makalipas ang 2-oras matapos kidnapin si Wo, isa namang Tsinoy trader ang binaril at nasa malubhang kalagayan sa bayan ng Pikit, North Cotabato.
Ayon sa police report, tatlong bala ng baril ang tumama sa tiyan at sa dibdib ni Cesar Lu, isang fish vendor sa bayan ng Pikit at bus inspector ng Weena People’s Transport. - Malu Manar