MANILA, Philippines – Brutal na kamatayan ang sinapit ng isang magsasakang dinukot ng mga bandidong Abu Sayyaf kung saan pinugutan ito at itapon sa liblib na bahagi ng Brgy. Mangalut sa bayan ng Akbar sa Basilan, ayon sa opisyal kahapon.
Sa ambush interview, kinumpirma ni P/Chief Supt. Bensali Jabarani, ang pamumugot sa binihag na biktimang si Doroteo Gonzales, 61.
Ang pugot na ulo ng biktima ay positibong kinilala ng pamilya nito kung saan natagpuan dakong alas-6 ng gabi kamakalawa sa bisinidad ng nabanggit na barangay pero patuloy pa ring hinahanap ang katawan nito.
Pinaniniwalaang walang pambayad ng ransom ang pamilya ng biktima kaya pinugutan ng grupo nina Furuji Indama at Nurhassan Jamiri.
Base sa ulat, ang biktima ay dinukot ng mga bandidong Abu Sayyaf sa Brgy. Puruan Buenavista sa Zamboanga City noong Abril at dinala sa Basilan.
Una nang humingi ng P1milyong ransom ang mga bandido hanggang sa naibaba sa P.5 milyon pero nabigo pa rin itong maibigay ng pamilya dahil mahirap lamang ang mga ito kaya pinugutan ang kawawang bihag.
Sa kasalukuyan, ay may walo pang bihag ang hawak ng mga bandido kabilang ang anim na guro, ang Sri Lankan peace volunteer na si Umar Jaleel at ang isang kawani ng lending firm na dinukot noong Enero at Pebrero 2009.
Matatandaan na ang hostage na si Cosme Aballes, 40, isang rubber plantation worker ay halos napugutan din matapos tagpasin sa leeg ng mga bandido na ang bangkay ay natagpuan sa bisinidad ng Lamitan City noong Abril 13, 2009.
Samantala, pinugutan din ang Peruvian American hostage na si Guillermo Sobero noong Hunyo 12, 2001 bilang regalo ng mga bandido kay Pangulong Gloria Macapagal-Arroyo sa mismong Araw ng Kasarinlan. (Joy Cantos)