MANILA, Philippines – Isang sibilyan ang iniulat na nasawi habang 16 iba pa ang nawawala makaraan manalanta ang landslide/flashflood sa bayan ng Magallanes at Sorsogon City, Sorsogon dulot ng bagyong “Dante” kahapon ng umaga.
Kinumpirma ni National Disaster Coordinating Council (NDCC) Executive Director Glenn Rabonza na si Nanette Aramda ng Brgy. Jubo, Magallanes ay nasawi habang apat ang nawawala sa Sorsogon City at 12 naman sa Brgy. Jubo, Magallanes.
Sa phone interview, ayon naman sa hepe ng Civil Defense Region 5 na si Raffy Alejandro, na hindi naman madaanan ang Juban – Magallanes Road matapos bumigay sa tubig-baha ang tulay at sa highway sa Brgy. Guinlogon-Sorsogon City bunga naman ng landslide.
Kabilang sa mga bayan na apektado ng landslide/flashflood ay ang mga bayan ng Pito Diaz, Gubat, Barcelona, Sta. Magdalena, Juban, Irosin, Magallanes, Casiguran at Sorsogon City.
Nasa 10-barangay naman ang lumubog sa tubig-baha simula pa noong Biyernes ng gabi kabilang ang Rizal at Guinlogon, Bacon District 3 sa Magallanes at Juban. Joy Cantos