P22M ari-arian naabo sa Romblon

CAMP VICENTE LIM, Laguna  , Philippines – Tinata­yang aabot sa P22 milyong halaga ng ari-arian ang tinupok ng apoy matapos masunog ang 18-kabahayan noong Biyer­nes Santo ng mada­ling-araw sa Romblon.

Ayon kay P/Senior Supt. Nilo Anzo, Romblon police director, nagmula ang apoy sa panaderya na malapit sa public market sa Barangay 2 Poblacion bandang alas-10:30 ng gabi na tumagal ng hanggang alas-2 ng mada­ling-araw ng Sabado.

Wala namang naiulat na nasawi o nasaktan sa na­sa­bing sunog.

Sa panayam ng PS­Ngayon kay P/Senior Fire Officer 2 Rolly Malay, Rom­blon fire chief, na­isam­pa sa general alarm ang naturang sunog na sumira sa 18 kabahayan.

Batay sa inisyal na im­bestigasyon nina SFO2 Malay, may sumabog na tangke ng liquefied petroleum gas (LPG) sa Rom­blomanon Bakeshop na pag-aari ni Jerry Victor Barnes.

Ayon naman kay Allen Virtucio, hepe ng office of the Civil Defense (OCD-MI­MA­ROPA (Mindoro, Marindu­que, Romblon, Palawan), nai-relocate na ang 18 pa­milya sa kani-kanilang mga kamag-anak sa pa­ nganga­siwa na rin ng mga tauhan ng Philippine National Red Cross.

Magsasagawa pa ng session ang mga konsehal at executive officials sa Lunes bago makapag­de­klara ng state of calamity sa area at makapag­pa­labas ng calamity fund para sa mga nasalanta ng sunog. Arnell Ozaeta