CAMP VICENTE LIM, Laguna, Philippines – Nagwakas ang paghahasik ng karahasan ng dalawang kalalakihan na pinaniniwalaang miyembro ng robbery-holdup gang makaraang mapatay sa pakikipagbarilan sa mga pulis sa bayan ng Biñan, Laguna kamakalawa ng gabi.
Isa sa napatay ay kinilala ni P/Senior Supt. Manolito Labador, Laguna police director, na si Saturnino Gobis ng Zone 3, Calabuso Street, Barangay Sto. Tomas, Biñan.
Samantala, nananatili namang unidentified ang isa pa na napatay ng pulisya.
Ayon sa police report, nagpapatrolya ang mobile car ng pulisya sa bisinidad ng South City Homes nang matiyempuhan nila ang traysikel na nakaparada sa madilim na bahagi ng Blessed Sacrament Street bandang alas-11:45 ng gabi.
Tinangka naman siyasatin ng pulisya ang traysikel, subalit bigla na lang pinaharurot ng dalawa hanggang sa magkaroon ng ilang minutong habulan.
Habang naghahabulan, pinaputukan ng mga suspek ang mga pulis hanggang sa nagkaputukan na ikinamatay ng dalawa habang nakatakas naman ang drayber ng traysikel.
Narekober mula sa crime scene ang 7-basyo ng caliber 45 pistol, isang colt 45 pistol, balisong at mga sketch ng dalawang subdivision na tinangkang pasukin ng mga suspek. (Arnell Ozaeta at Ed Amoroso)